मिति २०८३ असोज ९ देखि ११ सम्म उच्च सतर्कता अपनाउन जिल्ला सुरक्षा समितिको आग्रह
७ घण्टा अगाडी
२०८३-०६-०७
खाँदबारी, सङ्खुवासभा
नेपाल मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको विशेष बुलेटिन अनुसार आगामी असोज ९ गतेदेखि ११ गतेसम्म सङ्खुवासभा जिल्लामा भारी वर्षा, बाढी तथा पहिरोको उच्च जोखिम रहने प्रक्षेपण गरिएको छ।
सोही जोखिमलाई ध्यानमा राख्दै प्रमुख जिल्ला अधिकारी डा. डिजन भट्टराईको अध्यक्षतामा बसेको जिल्ला सुरक्षा समितिको बैठकले विपद् पूर्वतयारी तथा नागरिक सुरक्षाका लागि विशेष निर्णयहरू गरेको छ।
प्रमुख निर्णय तथा सुरक्षा व्यवस्था:
- भित्री सडकमा सवारी सञ्चालनमा रोक: असोज ९ देखि ११ गतेसम्म बेलुका ६ बजेदेखि बिहान ६ बजेसम्म मुख्य राजमार्ग बाहेकका भित्री कच्ची सडकहरूमा सवारी साधन सञ्चालनमा रोक लगाइएको छ।
- नदी/खोला किनारमा नजान अनुरोध: सो अवधिभर नदी तथा खोला किनारमा रहेका होटल/रेस्टुरेन्टमा भेला नहुन, अनावश्यक हिँडडुल नगर्न र माछा मार्न नजान आग्रह गरिएको छ। यसका लागि सुरक्षा निकायले माइकिङमार्फत सर्वसाधारणलाई सूचित गर्नेछन्।
- जोखिमयुक्त बस्तीको स्थानान्तरण: बाढी र पहिरोको उच्च जोखिममा रहेका क्षेत्रका बासिन्दाहरूलाई समयमै सुरक्षित स्थानमा स्थानान्तरण गर्न स्थानीय तहहरूसँग समन्वय गरी बस्ती स्थानान्तरण गरिने भएको छ।
- कर्मचारी र स्वास्थ्यकर्मी अलर्टमा: अत्यावश्यक काम बाहेक जिल्लास्थित सरकारी कार्यालयका प्रमुख तथा कर्मचारीहरूलाई जिल्ला नछाड्न निर्देशन दिइएको छ। साथै, जिल्ला अस्पताल र स्थानीय तहका स्वास्थ्य संस्थाहरूलाई औषधि र जनशक्तिसहित तयारी अवस्थामा राखिएको छ।
- पहिरो हटाउन उपकरणको व्यवस्था : राजमार्ग र मुख्य सडकहरूमा जान सक्ने पहिरो तुरुन्त हटाई यातायात सञ्चालन गर्न सडक डिभिजन र निर्माण कम्पनीहरूसँग रहेका जे.सी.बी. तथा स्काभेटरहरूलाई तयारी अवस्थामा राखिएको छ।
सर्वसाधारण सबैलाई जनधनको क्षति हनुबाट बच्नका लागि उच्च सतर्कता अपनाउन र विपद् सम्बन्धी निकालिएका सूचनामा ध्यान दिन हार्दिक अपिल गरिएको छ।